សម្លេងម្ចាស់ឆ្នោត​កម្ពុជា

លោក យ៉ែម បុញ្ញឫទ្ធិ តំណាងរាស្រ្តនិងជាអ្នកនាំពាក្យគណបក្សសង្គ្រោះជាតិដែលជាគណបក្ស ប្រឆាំង បានបញ្ជាក់កាលពីម្សិលមិញថា រដ្ឋសភានឹងរៀបចំសម័យប្រជុំនៅដើមសប្តាហ៍ក្រោយ ដើម្បីអនុម័តលើសេចក្តីព្រាងវិសោធនកម្មរដ្ឋធម្មនុញ្ញ បន្ទាប់​ពី​ក្រុម​ការ​ងារគណបក្សប្រជាជនកម្ពុជា និងក្រុមការងារគណបក្សសង្គ្រោះជាតិ បានពិភាក្សាចប់រួចហើយ។

លោកបានបញ្ជាក់ថា ក្រុមការងារគណបក្សសង្គ្រោះជាតិ និងគណបក្សប្រជាជននឹងបញ្ចប់សេចក្តីព្រាងច្បាប់ស្តីពីការរៀបចំនិង ការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោត (គ.ជ.ប) នៅសប្តាហ៍ក្រោយផងដែរ គឺបន្ទាប់ចប់ពិធីបុណ្យភ្ជុំបិណ្ឌ។

លោកក៏បានលើកឡើងដែរថា៖ «នៅថ្ងៃទី ២៩ ខែកញ្ញា យើងនឹងបញ្ចប់ចំណុចសំខាន់ៗនៃសេចក្តីព្រាងច្បាប់ទាំងមូល ហើយចំណុចនៅសល់បន្តិចបន្តួច យើងទុកឲ្យថ្នាក់ដឹកនាំគណបក្សទាំងពីរធ្វើការសម្រេច»។

ទោះជាយ៉ាងណា ចំពោះសេចក្តីព្រាងច្បាប់ស្តីពីការបោះឆ្នោតជ្រើសរើសតំណាងរាស្រ្ត លោកយ៉ែម បុញ្ញឫទិ្ធ បានបញ្ជាក់ថា សេចក្តីព្រាងច្បាប់នេះនឹងបញ្ចប់ការពិភាក្សានៅចុងឆ្នាំនេះ។

ប្រភពពីគេហទំព័រភ្នំពេញប៉ុស្តិ៍ចេញផ្សាយថ្ងៃ១៧ កញ្ញា ឆ្នាំ២០១៤។