សភាសិទ្ធិមនុស្សអាស៊ានថាក្រុមមនុស្សស្និទ្ធលោក ហ៊ុន ម៉ានី ជាអ្នកដឹកនាំបាតុកម្មប្រឆាំងលោក កីម សុខា
សភាសិទ្ធិមនុស្សអាស៊ាន លើកឡើងថាអ្នកដឹកនាំបាតុកកម្មប្រឆាំងលោក កឹម សុខា កាលពីថ្ងៃទី២៦ ខែតុលា ឆ្នាំ២០១៥ ភាគច្រើនជាក្រុមយុវជនដែលមាននិន្នាការគាំទ្រគណបក្សកាន់អំណាច និងសមាជិករបស់សហភាពសហព័ន្ធយុវជនកម្ពុជាដែលមានកូន លោកនាយករដ្ឋមន្ត្រី ហ៊ុន សែន គឺលោក ហ៊ុន ម៉ានី ជាប្រធាន។ ពីទីក្រុងហ្សាការតា ប្រទេសឥណ្ឌូនេស៊ី កាលពីថ្ងៃទី២៨ ខែតុលា ឆ្នាំ២០១៥ សភាសិទ្ធិមនុស្សអាស៊ាន សរសេរក្នុងសេចក្តីថ្លែងការណ៍របស់ខ្លួនថា អ្នកដឹកនាំក្រុមបាតុករភាគច្រើនត្រូវគេដឹងថាជាមនុស្សដែលជាសមាជិក របស់ក្រុមចលនាយុវជនគាំទ្របក្សកាន់អំណាច និងមានចំណងទាក់ទងជាមួយកូនប្រុសលោកនាយករដ្ឋមន្ត្រី ហ៊ុន សែន គឺលោក ហ៊ុន ម៉ានី។ ក្នុងសេចក្តីថ្លែងការណ៍នោះបានកត់សំគាល់ថា ក្នុងចំណោមក្រុមបាតុករទាំងនោះ ក៏មានកងកម្លាំងប្រដាប់អាវុធរបស់សាលាក្រុងភ្នំពេញមួយចំនួនផងដែរ។
