រដ្ឋាភិបាលសម្រេចដកសិទ្ធិលក់សំបុត្រចូលទស្សនាអង្គរវត្តពីក្រុមហ៊ុនសុខ គង់
មន្រ្តីបានឲ្យដឹងថារដ្ឋាភិបាលបានសម្រេចបញ្ឈប់ការផ្តល់សិទ្ធិទៅឲ្យក្រុមហ៊ុន សុខ គង់ ក្នុងការប្រមូលថវិកាពីការលក់សំបុត្រអង្គរវត្ត។លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តី បានឲ្យដឹងនៅព្រឹកថ្ងៃសុក្រនេះ ថាលោកនាយករដ្ឋមន្រ្តី ហ៊ុន សែន បានសម្រេចបែបនេះនៅក្នុងកិច្ចប្រជុំគណៈរដ្ឋមន្រ្តី។ លោកបញ្ជក់ថាការដកយកមកគ្រប់គ្រងវិញនេះ ជាកំណែទម្រង់មួយ ហើយការសម្រេចនេះនឹងចូលជាធរមានចាប់ពីដើមឆ្នាំ២០១៦។បើតាមលោក ផៃ ស៊ីផាន លោក ហ៊ុន សែន បានសម្រេចបង្កើតសហគ្រាសសាធារណៈ ដើម្បីធុរៈកិច្ចគ្រប់គ្រងរមណីយដ្ឋានបេតិកភណ្ឌអង្គរវត្ត ដែលមានក្រសួងទេសចរណ៍និងក្រសួងសេដ្ឋកិច្ច និងហិរញ្ញវត្ថុ ជាអន្តរក្រសួងរៀបចំគណៈកម្មាធិការនេះ។
