លោក ហ៊ុន សែន ប្រាប់វៀតណាមថាកម្ពុជាប្រកាន់ជំហរបោះបង្គោលព្រំដែនត្រឹមត្រូវនិងច្បាស់លាស់
លោកនាយករដ្ឋមន្រ្តី ហ៊ុន សែន បានថ្លែងនៅចំពោះមុខសមភាគីវៀតណាមថារដ្ឋាភិបាលកម្ពុជាប្រកាន់ជំហរដាច់ខាតក្នុងការបោះបង្គោលព្រំដែន“ដោយឈរលើច្បាប់ជាតិ អន្តរជាតិនិងប្រកបដោយភាពត្រឹមត្រូវនិងច្បាស់លាស់”។ក្នុងពិធីសម្ពោធបង្គោលព្រំដែនលេខ៣០នៅច្រកទ្វារអន្តរជាតិ អូយ៉ាដាវ ក្នុងខេត្តរតនគិរី កាលពីព្រឹកថ្ងៃសៅរ៍ លោក ហ៊ុន សែន បានថ្លែងថារហូតមកដល់ពេលនេះ ការបោះបង្គោលព្រំដែនគោកជាមួយប្រទេសវៀតណាម នៅសល់១៦,៨ភាគរយ ក្នុងចំណោមខ្សែព្រំដែនប្រវែង១២៧០គីឡូម៉ែត្រ។ លោកបន្តថាក្រោយពីបញ្ចប់ការបោះបង្គោលព្រំដែនគោកនេះ កម្ពុជានឹងចរចាជាមួយភាគីវៀតណាមរៀបចំព្រំដែនសមុទ្ររវាងប្រទេសទាំងពីរ ម្តង។
