លោក ហ៊ុន សែន ស្នើឲ្យច្បាប់ចែងថាប្រធានគណបក្សត្រូវមានសញ្ជាតិតែមួយ
នៅថ្ងៃចន្ទទី២៨នេះ លោកនាយករដ្ឋមន្រ្តី ហ៊ុន សែន បានស្នើឲ្យមានការធ្វើវិសោធនកម្មច្បាប់ស្តីពីគណបក្សនយោបាយ ដោយចែងថាប្រធានគណបក្សត្រូវមានសញ្ជាតិតែមួយប៉ុណ្ណោះ។ក្នុងពិធីចែកសញ្ញាបត្រដល់និស្សិតនៃ សាកលវិទ្យាល័យភូមិន្ទនីតិសាស្រ្តនិងវិទ្យាសាស្រ្តសេដ្ឋកិច្ច ដែលធ្វើឡើងនៅកោះពេជ្រ លោក ហ៊ុន សែន បានថ្លែងថាលោកស្នើឲ្យក្រុមការងារដែលនឹងពិភាក្សាពីការធ្វើវិសោធនកម្ម ច្បាប់ស្តីពីគណបក្សនយោបាយ បញ្ចូលចំណុចមួយដែលចែងថាប្រធានគណបក្សនយោបាយត្រូវមានសញ្ជាតិតែមួយ ប៉ុណ្ណោះ។ លោកបានថ្លែងបែបនេះក្រោយពីលោកបាននិយាយពាក់ព័ន្ធនឹងលោក សម រង្ស៊ី ដែលសញ្ជាតិបារាំងនិងកំពុងនិរទេសខ្លួនពីការចាប់ខ្លួន។
