លោកនាយករដ្ឋមន្រ្តី ហ៊ុន សែនស្នើឲ្យមានការដាក់ទោសទណ្ឌអ្នកបំពានវប្បធម៌សន្ទនា
លោកនាយករដ្ឋមន្រ្តី ហ៊ុន សែន បានស្នើឲ្យបញ្ចូលចំណុចដាក់ទោសទណ្ឌនៃការបំពានវប្បធម៌សន្ទនាតាមរយៈការ ជេរប្រមាថទៅក្នុងច្បាប់ស្តីពីគណបក្សនយោបាយ។ក្នុងពិធីចែកសញ្ញាបត្រដល់និស្សិតនៃសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច ដែលធ្វើឡើងនៅកោះពេជ្រ លោក ហ៊ុន សែន បានថ្លែងថាលោកនឹងមិនលើកលែងទោសឲ្យប្រធានគណបក្សសង្រ្គោះជាតិ លោក សម រង្ស៊ី នោះទេ ដោយលោកប្រកាសថាលោកនឹងកាត់ដៃខ្លួនឯងចោល ប្រសិនបើលោកចុះហត្ថលេខាលើកលែងទោស។ លោកបន្តថាលោក សម រង្ស៊ី ជាតែងតែចាក់ក្រឡេចរូបលោកនិងហៅរូបលោកថាមេចោរ ដែលលោកចាត់ទុកថានេះបំពានវប្បធម៌សន្ទនា។ លោកបានស្នើឲ្យក្រុមការងារដែលនឹងពិភាក្សាពីការធ្វើវិសោធនកម្ម ច្បាប់ស្តីពីគណបក្សនយោបាយ ដាក់បញ្ចូលវប្បធម៌សន្ទនាក្នុងច្បាប់នេះ ដោយបញ្ជាក់ពីការដាក់ទោសទណ្ឌចំពោះការជេរប្រមាថគ្នា។
