អ្នកនាំពាក្យគណបក្សប្រជាជនថាច្បាប់កំណត់សញ្ជាតិតែមួយមិនផ្ទុយពីរដ្ឋធម្មនុញ្ញនោះទេ
មន្ត្រីជាន់ខ្ពស់គណបក្សប្រជាជន កម្ពុជាអះអាងថាការបង្កើតច្បាប់កំណត់ឲ្យប្រធានគណបក្សនយោបាយ ត្រូវមានសញ្ជាតិតែមួយនោះ គឺស្របទៅនឹងរដ្ឋធម្មនុញ្ញ ដោយចាត់ទុកថាច្បាប់នេះនឹងធ្វើឲ្យឥស្សរជននយោបាយមានឧត្តមគតិ បម្រើជាតិពេញលេញ។កាលពីថ្ងៃទី២៨ ខែធ្នូ ឆ្នាំ២០១៥ ក្នុងពិធីចែកសញ្ញាបត្រដល់និស្សិតនៃសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច លោកនាយករដ្ឋមន្ត្រី ហ៊ុន សែន បានស្នើឲ្យមានការធ្វើវិសោធនកម្មច្បាប់ស្តីពីគណបក្សនយោបាយដោយចែងថា ប្រធានគណបក្សត្រូវមានសញ្ជាតិតែមួយប៉ុណ្ណោះ។ លោកបានថ្លែងថា៖ “ខាងផ្នែកគណបក្ស ប្រជាជនកំពុងតែគិតគូដោយសារយើងមានច្បាប់មួយរួចទៅហើយ ប្រធាននិងសមាជិកគណៈកម្មាធិការជាតិរៀបចំការបោះឆ្នោត ត្រូវតែជាសញ្ជាតិខ្មែរ ដូច្នេះពេលខាងមុខ ច្បាប់ស្តីពីបក្សនយោបាយ ចាំបាច់ត្រូវកំណត់ប្រធានបក្សនយោបាយ ត្រូវជាសញ្ជាតិខ្មែរ តែមួយទេ ដើម្បីចៀសវាងមានរឿងអីកាន់ប៉ាស្ព័របរទេសរត់ ហើយបរទេសមកអន្តរាគមន៍”។អ្នកនាំពាក្យគណបក្សប្រជាជនកម្ពុជា លោក សុខ ឥសាន បានឲ្យដឹងថាប្រទេសជាច្រើនលើសកលលោកមានច្បាប់កំណត់ឲ្យប្រធានគណបក្សមានសញ្ជាតិតែមួយ ហើយលោកចាត់ទុកថាការកំណត់នេះមិនផ្ទុយពីរដ្ឋធម្មនុញ្ញរបស់កម្ពុជា នោះទេ។
