លោក ឈាង វុន ថានឹងបោះសញ្ជាតិបារាំងចោល
តំណាងរាស្ត្រល្បីឈ្មោះមួយរូបមកពីគណបក្សប្រជាជនកម្ពុជា អះអាងថា លោកសុខចិត្តបោះបង់សញ្ជាតិបារាំងចោល បើច្បាប់កម្ពុជាកំណត់ឲ្យតំណាងរាស្ត្រទាំងអស់មានសញ្ជាតិខ្មែរតែមួយ ។ការលើកឡើងនេះធ្វើឡើងបន្ទាប់ពីលោកនាយរដ្ឋមន្ត្រីហ៊ុន សែន ថ្លែងថា លោកចង់ឲ្យមានច្បាប់កំណត់សញ្ជាតិតែមួយគត់សម្រាប់ប្រធានគណបក្ស នយោបាយ។ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន នៃក្នុងរដ្ឋសភា លោក ឈាង វុន ឲ្យដឹងកាលថ្ងៃអាទិត្យនេះថា លោកស្ម័គ្រចិត្តលាលែងសញ្ជាតិបារាំងដែលជាសញ្ជាតិទី២របស់លោកចោល បើសិនជានៅថ្ងៃក្រោយ ច្បាប់កំណត់ឱ្យតំណាងរាស្ត្រទាំងអស់នៅកម្ពុជាត្រូវមានសញ្ជាតិខ្មែរ តែមួយ។
