នាយករដ្ឋមន្រ្តីប្រតិកម្មនឹងការទិតៀនរបស់ប្អូនស្រីលើការរឹតបន្តឹងច្បាប់ចរាចរណ៍ថ្មី
លោក ហ៊ុន សែន នាយករដ្ឋមន្រ្តីនៃប្រទេសកម្ពុជានៅថ្ងៃអង្គារនេះ បានប្រតិកម្មតបនឹងការរិះគន់ប្អូនស្រីរបស់លោកលើច្បាប់ចរាចរណ៍ថ្មី ដោយលើកឡើងថាការរឹតបន្តឹងនេះដើម្បីកាត់បន្ថយការស្លាប់ដោយ សារគ្រោះថ្នាក់ចរាចរណ៍។ក្នុងពិធីសម្ពោធសមិទ្ធផលស្ពានអាកាសតិចណូដែលត្រូវបានដាក់ឈ្មោះថា ស្ពាន៥មករា លោកនាយករដ្ឋមន្រ្តីបានថ្លែងថាការរឹតបន្តឹងទើបតែអនុវត្តបានបីថ្ងៃតែ ប៉ុណ្ណោះ ដោយលោកសំណូមពរឲ្យប្រជាពលរដ្ឋទុកឱកាសឲ្យរដ្ឋាភិបាលអនុវត្ត មួយរយៈសិន ហើយក្រសួងមហាផ្ទៃនឹងប្រជុំពិភាក្សាដកស្រង់បទពិសោធន៍ថា ចំណុចណាត្រូវកែប្រែ ចំណុចត្រូវរឹតបន្តឹងហើយចំណុចណាត្រូវបន្ធូរបន្ថយ។ លោកបន្តថារដ្ឋាភិបាលបានដឹងពីការរិះគន់រដ្ឋាភិបាល ហើយនឹងគិតគូសំណូមពររបស់ប្រជាពលរដ្ឋ។ក្នុងពេលថ្លែងនោះ លោក ហ៊ុន សែន ក៏បានប្រតិកម្មទៅនឹងការរិះគន់របស់ប្អូនស្រីរបស់លោក។ លោកបញ្ជាក់ថា៖ “សូមផ្តាំ ទៅប្អូនស្រីវិញឲ្យស្គាល់បញ្ហា។ ប៉ុន្តែប្អូនស្រីត្រូវចាំថាបងមួយនេះជាបងរបស់ប្អូន គ្មានហេតុផលណាត្រូវធ្វើបាបប្រជាជាតិទេ”។
