លោក ហ៊ុន សែន ព្រមានអ្នកនយោបាយ និងសង្គមស៊ីវិលដែលលោកថាចង់ផ្តួលរំលំរដ្ឋាភិបាល
លោកនាយករដ្ឋមន្ត្រី ហ៊ុន សែន ព្រមានអ្នកនយោបាយ និងសង្គមស៊ីវិលមួយចំនួនដែលលោកថាបានយកលទ្ធិប្រជាធិបតេយ្យ និងសិទ្ធិមនុស្សក្លែងក្លាយដាក់មុខ ធ្វើឲ្យវឹកវដល់សង្គម ដើម្បីផ្តួលរំលំរដ្ឋាភិបាល។ក្នុងពិធីរំឭកខួបលើកទី៣៧ ថ្ងៃ៧មករា ឆ្នាំ២០១៦នេះ មេដឹកនាំគណបក្សកាន់អំណាចជាង៣០ឆ្នាំមកនេះបានថ្លែងថា តាមការប៉ាន់ប្រមាណសេដ្ឋកិច្ចកម្ពុជានៅ២០១៥មានកំណើនក្នុងរង្វង់៧ ភាគរយ ដោយសារការរីកចម្រើនវិស័យឧស្សាហកម្ម សេវាកម្ម និងកសិកម្ម រួមទាំងអត្រាដូរប្រាក់រៀលមានស្ថិរភាព ស្ថានភាពពាណិជ្ជកម្មក្រៅប្រទេសមានលក្ខណៈល្អប្រសើរជាងមុន ព្រោះមានកំណើននៃការនាំចេញមានទំហំធំជាងការនាំចូល។លោកនាយករដ្ឋមន្ត្រីថ្លែងថា៖ "ការពារដាច់ខាតរដ្ឋធម្មនុញ្ញ និងរាល់សមិទ្ធិផលរបស់សង្គមជាតិ សម្រេចបានតាំងពីថ្ងៃទី៧មករា១៩៧៩មក ហើយប្រឆាំងដាច់ខាតរាល់សកម្មភាពប្រើប្រាស់ស្លាកលទ្ធិប្រជាធិបតេយ្យ និងសិទ្ធិមនុស្សក្លែងក្លាយ ដើម្បីបោកប្រាស់បង្កភាពវឹកវរនៅក្នុងសង្គម”។
