លោក សម រង្ស៊ី ៖ ៧មករាជាឆាកល្ខោនរបស់វៀតណាម តែលោក ហ៊ុន សែន ថាអ្នកប្រឆាំង៧មករាគឺសម្ព័ន្ធមិត្តប៉ុលពត
សម រង្ស៊ី មេបក្សប្រឆាំងលោក ដែលកំពុងស្ថិតក្នុងស្ថានភាពនិរទេសខ្លួននៅក្រៅប្រទេសបានបន្តរិះគន់ ជាសាធារណៈអំពីថ្ងៃ៧ ខែមករា ១៩៧៩ ដោយលោកថាគឺជា"ឆាកល្ខោនដែលយួនបានរៀបចំទាំងអស់"។លោក សម រង្ស៊ី បានធ្វើការកត់សម្គាល់ដូចនេះ តាមរយៈសាររបស់លោកលើទំព័របណ្ដាញសង្គមហ្វេសប៊ុក។សាររបស់លោកបានរៀបរាប់ដូចនេះថា៖ “គេថាគេមករំដោះយើងពី ខ្មែរក្រហម តែបើអត់មានយួនកុំម្មុយនីស្ដពីដើមទី ក៏អត់មានខ្មែរក្រហមដែរ។ ឥឡូវនេះគេថា បើគ្មានថ្ងៃ៧ មករា ១៩៧៩ ក៏គ្មានអ្វីៗដែលយើងមានសព្វថ្ងៃដែរ។ តែបើគ្មានថ្ងៃ ១៧ មេសា ១៩៧៥ (ថ្ងៃខ្មែរក្រហមឡើងកាន់អំណាច) ក៏គ្មានថ្ងៃ៧ មករា ១៩៧៩ ដែរ”។
