រដ្ឋាភិបាលប្រកាសឈប់យកលុយផ្លូវជាតិលេខ៤ ចាប់ពីម៉ោង១២យប់នេះ
លោកនាយករដ្ឋមន្រ្តី ហ៊ុន សែន បានថ្លែងថារដ្ឋាភិបាលសម្រេចលុបចោលកិច្ចសន្យា ជាមួយក្រុមហ៊ុនអេហ្សិតអ៊ិនវេសមេន(AZ Investment) ដោយប្រកាសថានឹងឈប់យកលុយពីប្រជាពលរដ្ឋដែលធ្វើដំណើរឆ្លងកាត់ ចាប់ពីម៉ោង១២យប់ថ្ងៃពុធនេះ។ក្នុងកិច្ចប្រជុំរដ្ឋសភាព្រឹកថ្ងៃពុធនេះ លោក ហ៊ុន សែន បានថ្លែងថាលោកទទួលបានសេចក្តីរាយការណ៍ពីអភិបាលខេត្តព្រះសីហនុថា ក្រុមហ៊ុនមិនគោរពតាមការណែនាំរបស់លោកឲ្យបានត្រឹមត្រូវ ក្នុងការមិនឲ្យយកលុយពីប្រជាពលរដ្ឋមួយចំនួនដែលរស់នៅតាមបណ្តោយ ផ្លូវជាតិលេខ៤។ លោកក៏បានប្រកាសលុបចោលកិច្ចសន្យាជាមួយក្រុមហ៊ុនហើយថាចាប់ពីម៉ោង ១២យប់ថ្ងៃពុធនេះ ការចរាចរណ៍លើផ្លូវជាតិលេខ៤នេះ មិនត្រូវបង់លុយនោះទេ។ លោកក៏បានអំពាវនាវឲ្យប្រជាពលរដ្ឋគោរពច្បាប់ចរាចរណ៍ពេលធ្វើដំណើរ តាមផ្លូវជាតិលេខ៤នេះ។
