គ.ជ.ប នឹងចុះឈ្មោះបោះឆ្នោតជ្រើសរើសក្រុមប្រឹក្សាឃុំ-សង្កាត់ចាប់ពីខែឧសភា
មន្ត្រីគណៈកម្មាធិការជាតិរៀបចំការបោះឆ្នោត (គ.ជ.ប) ឲ្យដឹងថា កិច្ចការបន្ទាប់ទៀតក្រោយពីជ្រើសរើសអគ្គលេខាធិការ និងអគ្គលេខាធិការរងរួចហើយ កាលពីថ្ងៃសុក្រ ចុងសប្ដាហ៍កន្លងទៅនេះ គឺ គ.ជ.ប នឹងចាប់ផ្ដើមបើកយុទ្ធនាការចុះឈ្មោះបោះឆ្នោតជ្រើសរើស ក្រុមប្រឹក្សាឃុំ-សង្កាត់ សម្រាប់រៀបចំបញ្ជីបោះឆ្នោតថ្មីជាផ្លូវការចាប់ពីខែឧសភា។ មន្ត្រីអង្គការមិនមែនរដ្ឋាភិបាល ដែលឃ្លាំមើលដំណើរការបោះឆ្នោត យល់ឃើញថា លទ្ធផលបោះឆ្នោតអាចនឹងមានផលអវិជ្ជមានមិនខុសពីអាណត្តិមុនៗទេ ទោះបីជាមានថ្នាក់ដឹកនាំ គ.ជ.ប ថ្មីក៏ដោយ។មន្ត្រីនាំពាក្យរបស់គណៈកម្មាធិការជាតិរៀបចំការបោះឆ្នោត (គ.ជ.ប) លោក ហង្ស ពុទ្ធា ថ្លែងថា គ.ជ.ប នឹងបន្តពិគ្រោះយោបល់ និងរៀបចំកិច្ចការបន្តទៀតសម្រាប់ត្រៀមរៀបចំចុះឈ្មោះបោះឆ្នោត និងបញ្ជីបោះឆ្នោតថ្មី ក្នុងការជ្រើសរើសក្រុមប្រឹក្សាឃុំ-សង្កាត់។
