លោក សម រង្ស៊ី ៖ អ្នកមិនឲ្យលោកចូលស្រុកជា"ជនកំសាក"
ប្រធាន គណបក្សសង្គ្រោះជាតិលោក សម រង្ស៊ី ដែលកំពុងនិរទេសខ្លួននៅក្រៅប្រទេសគេចពីការចាប់ខ្លួន បានថ្លែងថាអ្នកដែលប្រើប្រាស់ប្រព័ន្ធតុលាការធ្វើបាបរូបលោកគឺជា ”ជនកំសាក” ។ក្នុងពេលជួបជាមួយប្រជា ពលរដ្ឋខ្មែររស់នៅទីក្រុងម៉ុងរ៉េអាល់ ប្រទេសកាណាដា កាលពីថ្ងៃទី៣១ ខែមករា លោក សម រង្ស៊ី ដែលត្រូវបានតុលាការកាត់ទោសឲ្យជាប់ពន្ធនាគារ២ឆ្នាំមានប្រសាសន៍ថា ថ្នាក់ដឹកនាំគណបក្សសង្រ្គោះជាតិមិនខ្លាចនឹងការសម្លុត ការទិញនិងការព្យាយាមបំបែក។ លោកបន្តថាលោកត្រូវគេប្រើប្រព័ន្ធតុលាការជាបន្តបន្ទាប់កាលពីមុន តែលោកថាការព្យាយាមដាក់សម្ពាធលើរូបលោកមិនបានសម្រេច។ មេដឹកនាំបក្សប្រឆាំងរូបនោះបញ្ជាក់ថាការបោះឆ្នោតនៅកម្ពុជាអាច ទទួលយកបាន ទាល់តែមានវត្តមានរបស់ប្រធានគណបក្សប្រឆាំង។លោកសម រង្ស៊ី បានថ្លែងថា៖ “គេយល់ឃើញថាអ្នកដែលមិនឲ្យសម រង្ស៊ី ចូលនោះគឺខ្លាចសម រង្ស៊ី គឺមនុស្សនោះកំសាក បើខ្លួនគ្រាន់បើ មានរឿងអីខ្លាចសម រង្ស៊ី តទល់គ្នាមួយទល់នឹងមួយ។
