សម្លេងម្ចាស់ឆ្នោត​កម្ពុជា

លោកនាយករដ្ឋមន្ត្រី ហ៊ុន សែន បានបញ្ជាក់ទៅកាន់សាធារណៈជន ថា “ដំណើរការប្រជាធិបតេយ្យមិនអាចផ្ទេរអំណាចពីឪពុកទៅកូន តាមចិត្តចង់នោះទេ”។  ការឆ្លើយតបបែបនេះ គឺដោយ សារការសែត​ឌឹណេ​ស៊ិ​នរបស់ថៃថា បានចុះផ្សាយកាលពីពេលថ្មីៗនេះថា កូនប្រុសលោកនាយករដ្ឋមន្ត្រីគឺលោក ហ៊ុន ម៉ាណែតដែលបច្ចុប្បន្នបម្រើការងារជាឧត្តមសេនីយ៍ឋានៈផ្កាយបីនៅ ក្រសួងការពារជាតិនោះ គឺនឹង​ឡើង​ជំនួសតំណែងជានាយករដ្ឋមន្ត្រី ហ៊ុន សែន។

ការថ្លែងបែបនេះ  គឺធ្វើឡើងនៅក្នុងសន្និសឹទអន្តរជាតិលើកទី៥ ស្ពីពីភាពជាអ្នកដឹកនាំបញ្ញវន្តឆ្នើម ២០១៤ ក្នុងសណ្ឋាគារស៊ូភីតែល ទីក្រុងភ្នំពេញ ទៅកាន់យុវជនប្រមាណជាង ៦រយនាក់មកពីប្រទេសចំនួន៤៧ លើសកលលោក។

លោកក៏បានលើកឡើងពីការជំរុញឱ្យមានការផ្លាស់ ប្តូរផ្នត់គំនិតរវាងមនុស្សចាស់ និងមនុស្សក្មេងដោយអនុញ្ញាតឱ្យយុវជនក្នុងជួរគណបក្សប្រជាជនកម្ពុជា  អាចកាន់តំណែងធំៗសំខាន់ៗក្នុងរដ្ឋាភិបាល ដូចជា​តំណែងរដ្ឋមន្ត្រី រដ្ឋលេខាធិការ និងអនុរដ្ឋលេខាធិការជាដើម។ ជាល្បាយដែលលោកនាយករដ្ឋមន្ត្រីបានអះអាងថា ដើម្បីនាំទៅដល់ការរីកចម្រើនក្នុងសង្គមកម្ពុជា។

លោកបន្តថាក្នុងនាមជាប្រមុខរដ្ឋាភិបាលកម្ពុជា លោកពិតជាមានការលំបាកណាស់សម្រាប់លោក នឹងកូនផ្ទាល់ដែលមានសមត្ថភាពខ្ពស់ៗប៉ុន្តែមិនអាចបញ្ចូលទៅជា សមាជិករដ្ឋាភិបាលបាននោះទេ ពីព្រោះ​ខ្លាច​ថា​នឹងមានការរិះគន់ថាជាបក្សពួកនិយមនោះ។ លោកអះអាងថា បានត្រឹមតែឱ្យកូនធ្វើការងារមនុស្សធម៌ជំនួសវិញ និងតែងតាំងកូនមន្ត្រីជាន់ខ្ពស់គណបក្សប្រជាជនចូលកាន់ តំណែង​ក្នុងរដ្ឋា​ភិបាល​តែ​ប៉ុណ្ណោះ។

ដកស្រង់ពីគេហទំព័រវិទ្យុបារាំងអន្តរជាតិជាខេមរភាសារចេញផ្សាយថ្ងៃទី០៦ សីហា នេះ។