លោកទិត សុធា អ្នកនាំពាក្យអង្គភាពព័ត៌មាន និងប្រតិកម្មរហ័ស នៃទីស្តីការ គណៈរដ្ឋមន្ត្រី បានមានប្រសាសន៍ថា ការទាមទាររបស់ អង្គការសង្គមស៊ីវិល ក្នុងការកំណត់អាណត្តិ នាយករដ្ឋមន្ត្រី គឺមិនមែនស្ថិតនៅលើ ការទាមទារចង់ផ្លាស់ប្តូរ អញ្ចេះអញ្ចោះ ទៅតាមអ្វីដែលជាការក្រឡុក ឬមួយក៏ទៅតាមចិត្ត របស់សង្គមស៊ីវិល តែម្ខាងទេ។ ពីព្រោះនេះ ជារឿងផលប្រយោជន៍ ជាតិទាំងមូល ហើយទាល់តែមាន ការ ជជែកគ្នា រវាងថ្នាក់ដឹកនាំកំពូលៗ ហើយក៏មានការចូលរួមពីមហាជន។
ការលើកឡើងបែបនេះ គឺបន្ទាប់ពីក្រុមអង្គការសង្គមស៊ីវិល បានធ្វើយុទ្ធនាការស្វែងរក ការគាំទ្រពីអតីតនាយករដ្ឋមន្ត្រី ចំនួន៣រូប ក្នុងកំណត់អាណត្តិ នាយករដ្ឋមន្ត្រី ចំនួន២អាណត្តិ ដែលមានរយៈពេល១០ឆ្នាំ។ ការស្វែងរកការគាំទ្រនេះ បានធ្វើឡើងមុនគេ ចាប់ផ្តើមពីលោកប៉ែន សុវណ្ណ អតីតនាយករដ្ឋមន្ត្រី ក្នុងសម័យរដ្ឋកម្ពុជា និងជាតំណាងរាស្ត្រ មណ្ឌលខេត្តកំពង់ស្ពឺ របស់គណបក្សសង្គ្រោះជាតិ នៅវិមានរដ្ឋសភា កាលពីថ្ងៃទី៣ ខែកញ្ញា ឆ្នាំ២០១៤។
តាមគំរោងអង្គការសង្គម ស៊ីវិល នឹងជួបបន្តស្វែងរកការគាំទ្រ ពីលោកអ៊ឹង ហួត អតីតនាយករដ្ឋមន្ត្រី នៅថ្ងៃទី៩ ខែកញ្ញា ឆ្នាំ២០១៤ នៅភោជនីយដ្ឋានបៃតង និងជួបជាមួយសម្តេចក្រុមព្រះ នរោត្តម រណឫទ្ធិ ចុងក្រោយគេ ដើម្បីសុំការគាំទ្រ ក្នុងការកំណត់អាណត្តិនាយករដ្ឋមន្ត្រី។
លោកទិត សុធា បានបន្តថា ពិតមែនហើយសង្គមស៊ីវិល គឺជាផ្នែកមួយនៅក្នុងសង្គម ក៏ប៉ុន្តែវាអាស្រ័យទៅលើ ទិដ្ឋភាពជាក់ស្តែង នៃការចូលរួមមតិយោបល់រួម ហើយជាឆន្ទៈនយោបាយ របស់អ្នកដឹកនាំផងដែរ។
ប៉ុន្តែនៅក្នុងដំណាក់កាល ដែលមិនទាន់មាន ការព្រមព្រៀងគ្នា ណាមួយនោះ គឺនៅក្នុងរដ្ឋធម្មនុញ្ញ ក៏មិនទាន់បានកំណត់ដែរ ហើយអាណត្តិរបស់នាយករដ្ឋមន្ត្រី គឺស្ថិតនៅក្នុងរយៈពេល ៥ ឆ្នាំម្តង។ ហើយសូម្បីតែនៅក្នុងកិច្ចព្រមព្រៀង រវាងគណបក្សនយោបាយទាំងពីរ កាលពីថ្ងៃទី២២ ខែកក្កដា ឆ្នាំ២០១៤ កន្លងមកនេះ ក៏អត់មានបញ្ជាក់ អំពីចំណុចអស់ទាំងនេះដែរ។
ដកស្រង់ពីគេហទំព័រCEN ចេញផ្សាយថ្ងៃទី០៤ កញ្ញា ឆ្នាំ២០១៤។