លោក សម រង្ស៊ី ប្រធានគណបក្ស សង្រ្គោះជាតិ បានថ្លែងថាលោកនឹងសុំទោស ប្រសិនបើលោកធ្វើឲ្យអ្នកណាមួយឈឺចាប់ តែលោកថាអ្នកនយោបាយត្រូវតែមានសុជីវធម៌។លោក សម រង្ស៊ី បានថ្លែងបែបនេះជាការឆ្លើយតបទៅនឹងលោកនាយករដ្ឋមន្រ្តី ហ៊ុន សែន ដែលបានទម្លាយសារសុំទោសរបស់លោក សម រង្ស៊ី និងហៅលោក សម រង្ស៊ី ថា”អាកូនក្បត់ជាតិ”។ឆ្លើយតបតាមអ៊ីម៉េល លោក សម រង្ស៊ី បានឲ្យដឹងនៅព្រឹកថ្ងៃព្រហស្បតិ៍នេះថា៖ “ខ្ញុំនឹងសុំអភ័យទោស ចំពោះនរណាក៏ដោយ ពេលណាក៏ដោយ បើខ្ញុំបានធ្វើឲ្យគេឈឺចាប់ក្នុងប្រការណាមួយដោយអចេតនា”។ លោកបន្ថែមថា៖ “ក្នុងការបំពេញតួនាទីរបស់យើងជាអ្នកនយោបាយ ក៏យើងត្រូវមានសុជីវធម៌ដែរ”។