Cambodian Voter's Voice

កាសែតខេមបូឌាដេលីប្រកាសមិនបើកកាសែតនៅស្រុកខ្មែរវិញព្រោះខ្លាចការធ្វើទុក្ខបុកម្នេញនិងអំពើពុករលួយ

2018-12-07 11:28:00 4680 Views

ម្ចាស់កាសែត ឌឹ ខេមបូឌា ដេលី (The Cambodia Daily) ប្រកាសមិនវិលទៅបើកកាសែតនៅស្រុកខ្មែរវិញទេ ព្រោះខ្លាចការធ្វើទុក្ខបុកម្នេញដដែលៗ និងអំពើពុករលួយ។ អ្នកស្រី ដេប្រា គ្រីស័រ ស្ទាល (Deborah Krisher Steele) ប្រាប់អាស៊ីសេរីតាមសារអេឡិចត្រូនិក នៅថ្ងៃទី៦ ខែធ្នូនេះ ថានៅក្នុងរបបលោក ហ៊ុន សែន ដែលប្រើប្រព័ន្ធពន្ធដារ និងតុលាការដើម្បីបំពាន និងធ្វើទុក្ខបុកម្នេញលើសារព័ត៌មានសេរី ពោលគឺចាប់ហើយដោះលែងវិញ ឬបិទហើយឲ្យបើកវិញ ជាដដែលៗ បែបនេះ មិនអាចឲ្យមុខរបរផ្នែកសារព័ត៌មានសុចរិត បើកដំណើរការឡើងវិញនៅស្រុកខ្មែរបាន ដោយមិនរងការតាមដាន និងត្រួតពិនិត្យ ឬត្រូវបង្ខំចិត្តបង់ប្រាក់សំណូកដើម្បីបន្តមុខរបរនេះ។ អ្នកស្រីបន្ថែមថា ក្នុងស្ថានភាពបែបនេះ ស្ថាប័នសារព័ត៌មានឯករាជ្យរបស់អ្នកស្រី អាចប្រឈមនឹងការតាមដានផង និងផ្ដល់សំណូកផង។ ដូច្នេះអ្នកស្រី មិនព្រមលុតក្រាម ក្រោមស្ថានភាពបែបនេះនោះឡើយ។ អ្នកស្រីសុខចិត្តបន្តដំណើរការកាសែតអ្នកស្រី នៅក្រៅប្រទេសកម្ពុជា ដោយបន្តផ្សាយព័ត៌មាន ដោយមិនយកប្រាក់កម្រៃ តាមប្រព័ន្ធអ៊ីនធឺណិត។

ប្រភពRFA៖https://bit.ly/2SBSUBH