សម្លេងម្ចាស់ឆ្នោត​កម្ពុជា

សេចក្តី​ព្រាងច្បាប់​ថ្មី​ស្តី​ពី​វិធានការ​ទប់ស្កាត់​ការ​ឆ្លងរាលដាល​នៃ​ជំងឺ​កូវីដ១៩​ និង​ជំងឺ​ឆ្លង​កាច​សាហាវ​ និង​ប្រកប​ដោយ​គ្រោះថ្នាក់​ធ្ងន់ធ្ងរ​ផ្សេងទៀត ​ត្រូវ​បាន​គណៈ​រដ្ឋមន្រ្តី​កម្ពុជា​ក្រោម​វត្តមាន​លោក​នាយករដ្ឋមន្រ្តី​ហ៊ុន សែន ​បាន​បើក​កិច្ច​ប្រជុំ​ពិភាក្សា ​និង​អនុម័ត​ជា​បន្ទាន់​កាលពី​ថ្ងៃអាទិត្យ​ម្សិលមិញ​នេះ​។ ​សេចក្តី​ព្រាងច្បាប់​ថ្មីនេះ ​មាន​៦​ជំពូក​ និង​១៨​មាត្រា ​ហើយ​ត្រូវ​បាន​បញ្ជូន​បន្ត​ទៅកាន់​រដ្ឋសភា ​ដើម្បី​បើក​កិច្ច​ប្រជុំ ​និង​អនុម័ត​។ លោកជិន ម៉ាលីន អ្នកនាំពាក្យក្រសួងយុត្តិធម៌កម្ពុជាបានគូសបញ្ជាក់ប្រាប់វិទ្យុបារាំងអន្តរជាតិនៅព្រឹកថ្ងៃចន្ទនេះថា សេចក្តីព្រាងច្បាប់ថ្មីនេះ ត្រូវរៀបចំធ្វើឡើងជាបន្ទាន់ ដើម្បីឱ្យទាន់សភាពការណ៍នៃការឆ្លងរាលដាលនៃជំងឺកូវីដ១៩នៅក្នុងប្រទេសកម្ពុជា។ លោកបន្តថា ការបង្កើតឱ្យមានសេចក្តីព្រាងច្បាប់នេះឡើង គឺដើម្បីឱ្យការអនុវត្តចំណាត់ការទប់ស្កាត់ជំងឺកូវីដ១៩រឹតរឹងតែមានប្រសិទ្ធភាពខ្ពស់បន្ថែមទៀត។