Cambodian Voter's Voice

ក្រសួងមហាផ្ទៃ ប្រតិកម្មនឹងការ ចុះផ្សាយអំពី វិធានការរបស់ ACU ដែលគ្រោងនឹង សម្អាតមន្ត្រីនគរបាលចរាចរណ៍ និងអត្តសញ្ញាណប័ណ្ណ ដែលមិនប្រក្រតី

2015-12-11 10:55:00 4829 Views

អ្នកនាំពាក្យក្រសួងមហាផ្ទៃ បានសម្តែងការប្រតិកម្មទៅនឹងការចុះផ្សាយអំពី វិធានការរបស់អង្គភាពប្រឆាំងអំពើពុករលួយ (ACU) ទៅលើមន្ត្រីនគរបាលចរាចរណ៍ និងនគរបាលធ្វើអត្តសញ្ញាណប័ណ្ណ ដែលប្រព្រឹត្តខុសប្រក្រតី នៅឆ្នាំ២០១៦ ខាងមុខនេះ។ ក្រសួងមហាផ្ទៃ បានចាត់ទុកថា សម្រង់ខ្លឹមសារនេះមានលក្ខណៈធ្ងន់ធ្ងរ និងធ្វើឱ្យប៉ះពាល់ដល់កិច្ចខិតខំប្រឹងប្រែងរបស់កម្លាំងនគរបាលជាតិ ដើម្បីខិតខំពង្រឹង ថែរក្សាសន្តិសុខជាតិ និងសណ្តាប់ធ្នាប់សាធារណៈទូទាំងប្រទេស ដែលនោះជាកត្តាដំបូងបំផុត មិនអាចខ្វះបានសម្រាប់ការអនុវត្ត គោលនយោបាយរបស់រាជរដ្ឋាភិបាល ក្នុងការអភិវឌ្ឍប្រទេសជាតិ។កាលពីម្សិលមិញ ក្នុងកម្មវិធីអបអរសាទរទិវាជាតិ និងអន្តរជាតិប្រយុទ្ធប្រឆាំងអំពើពុករលួយ នៅសាលមហោស្រពកោះពេជ្រ លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ បាននិយាយថា នៅឆ្នាំ២០១៦ ខាងមុខនេះ លោកនឹងចាប់ផ្តើមដុសក្អែលមន្ត្រី ធ្វើអត្តសញ្ញាណប័ណ្ណ ប៉ូលិសចរាចរណ៍ និងកុងត្រូលជជុះ ដែលប្រព្រឹត្តអំពើពុករលួយ និងភាពអសកម្ម នៅក្នុងការបំពេញការងារ។