Cambodian Voter's Voice

កម្ពុជា មិនចូលរួមចេញសេចក្តីថ្លែងការណ៍គាំទ្រសេចក្តីសម្រេចតុលាការអន្តរជាតិឡើយ

2016-06-20 11:10:00 5928 Views

លោកនាយក រដ្ឋមន្ត្រី ហ៊ុន សែន បានថ្លែងយ៉ាងម៉ឺងម៉ាត់ ថា រាល់សេចក្តីថ្លែងការណ៍ទាំងឡាយណា ដែលទាក់ទងនឹងបញ្ហាសមុទ្រចិនខាងត្បូងមិនសមស្រប កម្ពុជា មិនចូលរួមជាមួយឡើយ។ លោក ក៏ប្រកាសមិនគាំទ្រចំពោះ សេចក្តីសម្រេចរបស់មជ្ឈត្តការអន្តរជាតិ ដែលប្តឹងដោយហ្វីលីពីនប្រឆាំងចិនផងដែរ។

នាពិធីបិទ វគ្គប្រគល់សញ្ញាបត្រដល់សិស្សសាលាភូមិបាលនៅព្រឹកថ្ងៃចន្ទនេះ លោកហ៊ុន សែន បានអះអាងជាថ្មីពីគោលជំហររបស់កម្ពុជាលើបញ្ហាសមុទ្រចិនខាងត្បូង និងទទូចឲ្យបញ្ឈប់ចោទប្រកាន់កម្ពុជាថាជាអ្នកបំផ្លាញដំណោះស្រាយលើបញ្ហាសមុទ្រចិនខាងត្បូងផងដែរ។ លោកនាយក រដ្ឋមន្ត្រី បានអំពាវនាវឲ្យភាគីពាក់ព័ន្ធដោះស្រាយជម្លោះ ដោយប្រើយន្តការអាស៊ាន-ចិន ដើម្បីអនុវត្តឲ្យបានត្រឹមត្រូវនូវសេចក្តីថ្លែងការណ៍ភាគីក្រម ប្រតិបត្តិសមុទ្រចិនខាងត្បូង(DOC) ខិតខំតាក់តែងក្រមប្រតិបត្តិសមុទ្រចិនខាងត្បូង(COC)រវាងអាស៊ាន- ចិននិងប្រទេសពាក់ព័ន្ធត្រូវដោះស្រាយ ដោយជជែកពិភាក្សាគ្នា។ ជាមួយគ្នានេះ លោក ក៏ទទូចភាគីពាក់ព័ន្ធអត់ធ្មត់ពីការគំរាម និងប្រើប្រាស់កងកម្លាំងដើម្បីដោះស្រាយបញ្ហានេះផងដែរ។