Cambodian Voter's Voice

លោក សុន ឆ័យ៖ ការកាត់ប្រាក់ខែតំណាងរាស្ត្របក្សប្រឆាំង មិនស្របតាមច្បាប់ឡើយ

2016-06-28 10:00:00 4828 Views

រដ្ឋសភា គួរតែរកដំណោះស្រាយដោយសន្តិវិធី ប្រសើរជាងការព្រមានកាត់ប្រាក់ខែតំណាងរាស្ត្រគណបក្សសង្គ្រោះជាតិ។ ម្យ៉ាងទៀត ការកាត់ប្រាក់ខែតំណាងរាស្ត្របែបនេះ គឺផ្ទុយទៅនឹងរដ្ឋធម្មនុញ្ញ និងច្បាប់ស្តីពីលក្ខន្តិកៈតំណាងរាស្ត្រ រួមទាំងបទបញ្ជាផ្ទៃក្នុងនៃរដ្ឋសភា ថែមទៀតផង។ នេះជាការលើកឡើងរបស់ លោក សុន ឆ័យ មន្ត្រីជាន់ខ្ពស់គណបក្សសង្គ្រោះជាតិ។មន្ត្រីជាន់ខ្ពស់ បក្សប្រឆាំង លោក សុន ឆ័យ បានអះអាងថា ពុំមានច្បាប់ណាមួយ ដែលអនុញ្ញាតឲ្យរដ្ឋសភា កាត់ប្រាក់ខែតំណាងរាស្ត្រនោះទេ។ លោកបកស្រាយថា រដ្ឋសភា អាចកាត់ប្រាក់ខែតំណាងរាស្ត្រណាម្នាក់ លុះត្រាតែតំណាងរាស្ត្ររូបនោះ ឈប់សម្រាកឬមិនចូលបំពេញការងារ ដោយគ្មានមូលហេតុច្បាស់លាស់។
ថ្លែងប្រាប់សារព័ត៌មានថ្មីៗ លោក សុន ឆ័យ បានលើកឡើងថា តំណាងរាស្ត្របក្សសង្គ្រោះជាតិ មានហេតុផលត្រឹមត្រូវ ពីការមិនចូលប្រជុំ ដូច្នេះវា មិនសមទំនងឡើយ ប្រសិនបើរដ្ឋសភា កាត់ប្រាក់ខែរបស់ពួកគេមែននោះ។ មន្ត្រីជាន់ខ្ពស់បក្សប្រឆាំងរូបនេះ បានសង្កត់ធ្ងន់ៗថា៖«យើងបានសរសេរលិខិតទៅសម្តេចប្រធាន (សម្តេច ហេង សំរិន) រួចហើយ ដោយបញ្ជាក់ពីមូលហេតុដែលយើងមិនចូលសភា។ យើង មិនមែនឈប់ដោយគ្មានមូលហេតុនោះទេ»។ ប្រភពVOD
http://thmeythmey.com/?page=detail&ctype=article&id=41501&lg=kh