សម្លេងម្ចាស់ឆ្នោត​កម្ពុជា

«បើមានមណ្ឌលយុវជនពួកគេអាចផ្លាស់ប្តូរយោបល់គ្នាបាន។ ជួនកាលសិស្សអាចលើកឡើងពីគ្រូបង្រៀនមិនកើត និងបញ្ហាផ្សេងៗដែលជួបប្រទះក្នុងសាលា តែគ្មានកន្លែងនិយាយ» នេះជាការលើកឡើងរបស់លោក ហង់ ជួនណារ៉ុន រដ្ឋមន្ត្រីក្រសួង អប់រំ យុវជន និងកីឡា ថ្លែងប្រាប់ ភ្នំពេញ ប៉ុស្តិ៍ ម្សិលមិញ។ លោកយល់ថាដោយសារ សព្វថ្ងៃមានក្រុមប្រឹក្សាយុវជន និងក្រុមប្រឹក្សាកុមារនៅសាលាកម្រិតទូទៅ ប៉ុន្តែពួកគេត្រូវការកន្លែងសម្រាប់ពិភាក្សា និង​ផ្លាស់​ប្តូរ​យោ​បល់រវាងមាតា បិតា លោកគ្រូ អ្នកគ្រូ និងសិស្សានុសិស្សពីបញ្ហានៃការសិក្សារបស់សិស្សទាំងនោះ ហើយក្រៅពីនេះមណ្ឌលយុវជននឹងក្លាយជាកន្លែងបណ្តុះបណ្តាលវគ្គបំណិន ជីវិត វគ្គពង្រឹងសមត្ថភាព សហ​គ្រិន​ភាព​ដល់​យុវជន​ផងដែរ។

ដោយឡែកក្នុងការបង្កើតនេះ លោក ហង់ ជួនណារ៉ុន បានចេញសេចក្តីណែនាំមួយកាលពីថ្ងៃ ទី២៥ ខែ កុម្ភៈដល់មន្ទីរអប់រំរាជធានី-ខេត្ត «ត្រូវរកទីតាំងដីសម្រាប់សាងសង់មជ្ឈមណ្ឌលយុវជន ឲ្យមាននៅគ្រប់រាជធានី ខេត្ត-ក្រុង ស្រុក-ខណ្ឌ» ដែលនេះជាការឆ្លើយតបតាមផែនការយុទ្ធសាស្ត្រនៃគោលនយោបាយស្តីពី ការអភិវឌ្ឍន៍យុវជនកម្ពុជាដែលបានអនុម័តកាលពីឆ្នាំ ២០១១។ បន្ថែមពីនេះ មណ្ឌលយុវជន «បណ្តុះស្មារតី និង​លើកទឹក​ចិត្តយុវជន​ឲ្យ​ចូល​រួម​ការងារ​ស្ម័គ្រចិត្តនៅតាមសហគមន៍ តាមទីប្រជុំជន ជនបទ និងតំបន់ដាច់ស្រយាល»។

គេហទំព័រភ្នំពេញ ប៉ុស្តិ៍ដដែលនេះក៏បានដកស្រង់ លិខិតរបស់លោករដ្ឋមន្ត្រី ដោយមានការបញ្ជាក់ពីតួនាទី និងភារកិច្ចរបស់មជ្ឈមណ្ឌលយុវជន ដែលនឹងមានសមាជិកអាយុពី ១៥ ដល់ ៣០ឆ្នាំ គឺបណ្តុះបណ្តាលជំនាញទន់ និង​បំណិន​ជីវិត សមត្ថភាពជំនាញវគ្គខ្លីៗ។ ក្រៅពីនេះ ក៏ត្រូវបង្កើតកម្មវិធីដែលអាចកសាងសមត្ថភាពជំនាញការងារស្ម័គ្រ ចិត្ត និងការងារហាត់ការដល់យុវជន លើកកម្ពស់វិស័យសិល្បៈ វប្បធម៌ និងបរិស្ថាន បង្កើតកម្មវិធីបង្កើនចំណេះដឹង និង​បទ​ពិសោធ​ដើម្បីផ្សារភា្ជប់យុវជន និងស្មារតីទទួលខុសត្រូវ។

ការបង្កើតមជ្ឈមណ្ឌលយុវជនជាការឧបត្ថម្ភថវិកាពីរដ្ឋាភិបាល និងសប្បុរសជនផ្សេងៗ អង្គការជាតិ អន្តរជាតិ និងដៃគូអភិវឌ្ឍន៍ ប៉ុន្តែ លោក ហង់ ជួនណារ៉ុន មិនអាចប្រាប់ពីទំហំថវិកាដែលនឹងត្រូវចំណាយលើការសាងសង់មណ្ឌល ទាំងនេះឡើយ៕