សម្លេងម្ចាស់ឆ្នោត​កម្ពុជា

សម្ព័ន្ធកំណែទម្រង់ការបោះឆ្នោត (ERA) និងគណបក្សមិនជាប់ឆ្នោតក្នុងសភា នៅថ្ងៃព្រហស្បតិ៍នេះ ទទូចជាថ្មីដល់គណបក្សជាប់ឆ្នោតទាំងពីរឲ្យបើកចំហ និងបង្ហាញតម្លាភាព គួបផ្សំនឹងលក្ខណៈវិនិច្ឆ័យ ក្នុង​ដំណើរ​ការជ្រើសរើសសមាជិកគណៈកម្មាធិការជាតិរៀបចំការបោះឆ្នោត ថ្មី។

ការស្នើនេះ ធ្វើឡើងក្នុងវេទិកាតុមូលស្តីពីការជ្រើសរើសសមាសភាព គជប ថ្មី ក្រោមការរៀបចំរបស់អង្គការសង្គមស៊ីវិល ចំនួន២០ ដោយមានការចូលរួមពីគណបក្ស​នយោបាយ​ចំនួន​៥ ដែល​បាន​ឈរ​ឈ្មោះ​បោះ​ឆ្នោត​ជ្រើសតាំងតំណាងរាស្ត្រ ក្នុងនីតិកាលទី៥ កន្លងទៅនេះ។

សម្ព័ន្ធកំណែទម្រង់ការបោះឆ្នោត ក៏បានស្នើឲ្យមានការដាក់បញ្ចូលនូវលក្ខណៈវិនិច្ឆ័យ ៤ចំណុច ក្នុងការជ្រើសរើសសមាជិក គជប ថ្មី ដែលមិនមានកំណត់ក្នុងកិច្ចព្រមព្រៀងរបស់ក្រុមការងារគណបក្សទាំងពីរ រួមមានការកំណត់សញ្ជាតិខ្មែរពីកំណើត ការតម្រូវឲ្យមានសញ្ញាបត្រឧត្តមសិក្សា បទពិសោធនការងារយ៉ាងតិច១០ឆ្នាំក្នុងវិស័យពាក់ព័ន្ធ រួមនឹងលក្ខខណ្ឌ ដែលមិនជ្រើសចេញសមាជិកសភា ឬសាច់​ញាតិ​របស់​អ្នកនយោបាយជាដើម។

វេទិកាតុមូលនេះ មិនមានវត្តមានតំណាងពីគណបក្សប្រជាជនកម្ពុជាឡើយ តែ​យោងតាម​​គេហទំព័រវីអូឌី បាន​ឲ្យដឹងថា​លោក ឈាង វុន ប្រាប់​ថា ក្រុមការងារ​គណបក្ស​នេះ​នឹង​គោរព​ទៅតាម​កិច្ចព្រមព្រៀង​កំពូល​បក្ស​ទាំងពីរ កាលពី​ថ្ងៃ​ទី​២២ ខែកក្កដា ចំពោះ​ការជ្រើសរើស​សមាជិក គជប ថ្មី​នេះ ហើយ​ក្រុមការងារ​បក្ស​ទាំងពីរ នឹង​បន្ត​ពិភាក្សា​លើ​ការងារ​នេះ​នៅ​ថ្ងៃ​ខាងមុខ​។